БИШКЕК, 19-мар. — Sputnik. Республикалык ден соолукту чыңдоо борбору кумшекердин айланасындагы ажиотажга байланыштуу аны ашыкча колдонуу ден соолукка зыян экенин эскертти.
Учурда шекерге көз карандылыктан арылуу үчүн эң жакшы убакыт экени белгиленет.
"Кумшекер тиштерге гана зыянын тийгизбестен, салмак коштуруп, мунун айынан өнөкөт оорулар жаралат. Ошондой эле экинчи типтеги кант диабети, жүрөк-кан тамыр оорулары пайда болот. Глюкоза чарчатып-чаалыктырып, маанайдын чөгүшүнө да алып келет. Шекери көп азыктар курсакты бат тойгузгандай болот, бирок кайра эле карынды ачыртат", — деген медиктер.
Канттын суткалык нормасы 50 граммга чейин же 10 чай кашык, бирок аны 25 граммга чейин азайткан оң. Бул беш чай кашык шекерге же бир стакан мөмө-жемиш ширесине барабар.
Адистер чайга же башка суусундукка салынган накта шекерден сырткары, тамак-аштын курамында да таттуу көп болушу мүмкүндүгүн эскертти. Маселен, газдалган суусундуктун бир кичинекей бөтөлкөсүндө 10 чай кашыкка чейин кумшекер камтылат. Тез сиңүүчү канттар адатта нанда, күрүчтө, макарондо, кетчупта жана башка азыктарда кездешет.
Кушмекерди кантип азайтуу керек
Конфет жегенди, газдалган суусундуктарды, мөмө-жемиш жана сүт ширелерин, күч-кубат берүүчү суюктуктарды, сатыктагы даяр чай жана кофени ичүүнү акырындан азайтыңыз. Азыртадан кичинекей балдарга таттууну берүүнү да токтотуу керек.
Шам-шум эткенде таттуу эмес, ден соолукка пайдалуу азыктарды жегенди адатка айлантыңыз.