БИШКЕК, 18-мар. — Sputnik. Жогорку Кеңеште каралып жаткан арыктап кеткен 500 миң гектар жайытты өздөштүрүү боюнча мыйзам долбоору ишке ашкан күндө дагы жайыттар азайып кетпейт. Мындай пикирин Айыл чарба министрлигинин алдындагы Жайыт жана мал өстүрүү департаментинин укук жана адам ресурстарын башкаруу секторунун башчысы Гүлнура Жакыпбекова билдирди.
"Ал жерлер азыр деле жакшы жайыт эмес. Арык, чөп жакшы өспөсө, мал жайылбай эле пайдасыз жатат. Андыктан жайыттын аянты азайып кетет дегенге кошулбайм", — деди ал.
Адистин айтымында, сөз болуп жаткан 500 миң гектар жерди өздөштүрүү үчүн айыл чарба багытындагы жерлер категориясына өткөрүлөт. Анткени жайытка айдоо иштерин жүргүзүүгө мыйзам жол бербейт.
Эске салсак, Жогорку Кеңеште арыктап кеткен 500 миң гектар жайытты өздөштүрүү боюнча мыйзам долбоору талкууланып, 17-март күнү биринчи окуудан өттү. Демилгелеген Айыл чарба министрлиги бул жерлердин түшүмдүүлүгү 0,8 гана пайыз экенин айтып, экономикалык пайдасы нөлгө барабар деп жатат.
Андыктан бул жайыттарды фермерлерге айыл чарба багытында колдонууга берүү сунушталган. Министрлик мунун артынан дыйкандар дагы, өлкө экономикасы дагы утушта болоруна ишендирүүдө.
Негиздемеде айтылгандай, эгер бул долбоор кабыл алынып калса, арыктап кеткен жайыттар айыл чарба жерлеринин мамлекеттик фондуна өткөрүлөт. Аны кимдир бирөөгө колдонууга берүү тартибин министрлер кабинети аныктайт.