БИШКЕК, 16-мар. — Sputnik. Дүйнөдө жаратылыштын булганышынан улам экология жабыркап, адамга зыянын тийгизген, "өлүм ордолору" деп аталган жерлер көбөйүп жатат. Бул тууралуу The Guardian басылмасы БУУнун адам укуктары жана айлана-чөйрө боюнча өкүлү Дэвид Бойддун докладына таянып жазды.
Кирдеген мындай аймактарда миллиондогон адам өмүр кечирип келет. Көптөр инсультка, жүрөк жана дем алуу органдарынын оорусуна, ракка кабылган. Абадагы оор металлдардан, башка коркунучтуу заттардан улам акыл-эси, психикалык саламаттыгы жабыркаган.
"Айлана-чөйрөнүн олуттуу кирдеши 9 миллион өмүрдү мезгилинен эрте алып кетти. Бул COVID-19 адамзатты аралаган пандемиянын алгачкы бир жарым жылдык мөөнөтүндө көз жумгандардан эки эсе көп. Негизинен "өлүм ордолору" ошол аймактагы өнөр жай ишканаларынын иштешинен пайда болгон", — деди Бойд.
Ал өтө эле кирдеген райондордун ичинен Луизиана (АКШ) штатындагы "рак аллеясын" бөлүп көрсөттү. Аталган жерде мунайды кайра иштетүүчү жана нефтихимиялык 100дөн ашуун заводдор иштейт. Кооптуу жерлер деп андан сырткары Замбиядагы Кабве шаарын, Румыниядагы Пата Рат таштандысын, Франциядагы Гваделупа, Мартиника аймактарын атаган.