БИШКЕК, 15-мар. — Sputnik. Мамлекет башчы Садыр Жапаров Түркмөнстандын азыркы президенти Гурбангулы Бердымухамедов жана шайланган жетекчиси Сердар Бердымухамедов менен телефон аркылуу сүйлөштү.
Бул тууралуу маалымдаган президенттин маалымат кызматы Жапаров Гурбангулы Бердымухамедовду 12-марттагы президенттик шайлоонун ийгиликтүү өтүшү менен куттуктаганын билдирди.
"Жапаров Кыргызстан менен Түркмөнстандын ортосундагы достукту жана өз ара пайдалуу кызматташтыкты өнүктүрүүгө жеке көңүл бургандыгы үчүн Гурбангулы Бердымухамедовго ыраазычылык билдирди. Аны менен парламенттин жогорку палатасынын төрагасы катары конструктивдүү байланыштарды улантууга даяр экенин айтты", — деп жазылган маалыматта.
Тараптар күн тартибиндеги аймактык актуалдуу маселелер боюнча пикир алмашкан.
Жапаров Сердар Бердымухамедовду президенттик шайлоодогу жеңиши менен куттуктап, мамлекеттик жогорку кызматта ийгилик каалаган.
"Тараптар кыргыз-түркмөн кызматташтыгын талкуулады. Жапаров Түркмөнстандын шайланган президенти Сердар Бердымухамедовду 2022-жылдын 21-июлунда Ысык-Көлдүн жээгинде өткөрүү пландалып жаткан Борбордук Азия мамлекет башчыларынын IV консультативдик жолугушуусуна катышуу үчүн Кыргызстанга чакырды", — деп кабарлады маалымат кызматы.
Буга чейин Жапаров Сердар Бердымухамедовду президенттик шайлоодогу жеңиши менен куттуктап, телеграмма жөнөткөнү кабарланган.
Эске салсак, Түркмөнстандын президентин тандоо боюнча өткөн шайлоодо Сердар Бердымухамедов утуп чыккан.
12-мартта Түркмөнстанда президентти мөөнөтүнөн мурда шайлоо өтүп, ага калктын 97,12 пайызы катышты. Жалпысынан тогуз талапкер ат салышып, арасында учурдагы президент Гурбангулы Бердымухамедовдун уулу Сердар Бердымухамедов бар эле.