БИШКЕК, 15-мар. — Sputnik. Мурдагы президент Алмазбек Атамбаевди 11 жылга эркинен ажыраткан буга чейинки сот өкүмүн Жогорку Сот күчүндө калтырды.
Аталган соттун маалымат кызматы Индира Жолдубаева, Абдухалим Раимжанов жана Калыбек Качкыналиевге карата чыккан өкүмдөр өзгөртүлгөнүн айтты.
"Иштин мөөнөтү өтүп кеткендигине байланыштуу Жолдубаевага жаза дайындалбай, Кылмыш-жаза кодексинин 304-беренесинин 2-пунктусунун ("Кызмат абалынан кыянаттык менен пайдалануу") негизинде (1997-жылдагы редакциясында) күнөөлүү деп табылды", — деп жазылган билдирүүдө.
Биринчи май райондук сотунун сотко чейинки өндүрүш учурунда 2019-жылдын 26-августундагы Жолдубаеванын мүлкүн камакка алуу боюнча өкүмү жокко чыгарылганы айтылды. Маалыматта сот актыларынын калган бөлүгү өзгөртүүсүз калганын белгилешти.
Эске салсак, 2021-жылдын декабрь айында Алмазбек Атамбаевдин эки иш боюнча камакка алуу бөгөт чарасы жокко чыгарылган. Жогорку сот 12-октябрда Башкы прокуратуранын өтүнүчү менен Батукаевдин иши боюнча Атамбаевге мурда чыккан өкүмдү кайра калыбына келтирген.
Биринчи май райондук соту 2020-жылдын июнь айында Атамбаевди Батукаевдин иши боюнча 11 жыл эки айга кескен. Бишкек шаардык соту бир айдан кийин райондук соттун чечимин күчүндө калтырган. Андан кийин иш Жогорку Сотко жетип, бирок каралбай эки жолу башка күнгө жылдырган. Буга чейин Замир Жоошев эгерде Жогорку сот Батукаев боюнча протоколун жокко чыгарса, Атамбаев коё берилиши мүмкүн экендигин билдирген.