БИШКЕК, 11-мар. – Sputnik. Президент Садыр Жапаровдун сөөк коюу жана той-аштагы ысырапкерчиликке тыюу салуу боюнча жарлыгы шариятка туура келип, мамлекеттин кызыкчылыгын көздөйт. Мындай пикирин теолог Акимжан Эргешов билдирди.
Ал Sputnik Кыргызстан агенттигинин маалымат борборунда өтүп жаткан "Той менен сөөк коюудагы ысырапкорлук" темасындагы тегерек столго катышууда.
"Ысырапкерчиликти шарият дагы жектейт. Мисалы, Россияда иштеп, бала-бакырасын багып жүргөн жаран кырсыктап каза болду дейли. Бул жакта бешиктен бели чыга элек балдары бар. Тууган-уругу чогулат дагы мал сойгула дейт. Кийин балдары багуучусу жок калганы аз келгенсип, союлган жылкы үчүн карызга батат. Үй-бүлө кыйналат, жакырчылык күч алат. Бул нерсе акыры барып мамлекетке күч келтирет", — деди теолог.
Ошондой эле ал өнүгөм деген мамлекетте пайда алып келе турган мыйзам эч талкуусуз жана так аткарылышы керектигин айтты.
"Коомго пайда алып келчү мыйзам болсо, унчукпай аткарышыбыз керек. Албетте, мындай чектөөлөр ар бирибизге жагып, баары колдойт деп айтуу кыйын. Сөзсүз каршы чыккандар болот. Бирок массага жарыгы тийчү чечим бир ууч кишинин кызыкчылыгы үчүн артка кайтарылбашы керек. Эгер сарамжал болбосок, эч качан бутубузга тура албайбыз", — деди адис.
Буга чейин президент Садыр Жапаровдун өлүм чыккан жерде ысырапкерчиликке жол бербөө боюнча жарлыгы жарыяланган. Бул жарлыктын максаты — жарандардын социалдык, экономикалык жашоо деңгээлин жогорулатуу экени айтылган. Ошондой эле диний ырым-жырымдарды, үрп-адаттарды жана коомдун руханий абалына терс таасирин тийгизүүчү башка иш-чараларды өткөрүүдө ысырапкорлукту алдын алуу.
Ал эми парламенттик угуу учурунда той-аш жана маркумду узатуу жөрөлгөлөрүндө эреже бузгандарга 150 миң сомго чейин айып салуу сунушталган.
Көп өтпөй Кыргызстандын муфтияты маркумду узатуудагы ысырапкорлукту алдын алуу жөнүндө фатва чыгарды. Анда ислам шариятында маркумду акыркы сапарга узатууда сөөк чыккан үйдө үч күнгө чейин казан асып мал союлбай, тамак берилбей турганы белгиленген.