БИШКЕК, 11-мар. – Sputnik. Сөөк коюу жана той-аштагы ысырапкорлукка тыюу салуу боюнча мыйзам долбоорунда басым чектөөлөргө эмес, элдин аң-сезимин өстүрүүгө жасалышы керек. Мындай пикирин кыргыз таануучу Мелис Мураталиев билдирди.
Ал Sputnik Кыргызстан агенттигинин маалымат борборунда өтүп жаткан "Той менен сөөк коюудагы ысырапкорлук" темасындагы тегерек столго катышты.
"Ысырапкерчилик, куру намыс менен атаандаштык көйгөйү бар. Аны эч ким танбайт. Бирок сөз болуп жаткан мыйзам долбоорунда күчкө салып, бир нерсени чектөө менен эмес, элдин аң-сезимине жеткирүү жагына басым жасалышы керек. Мисалы, калктын билим деңгээлин өстүрүп, бала бакча, мектептен тарта системалык негизде иштеш керек. Ошондо гана ар бир адамдын аң-сезими жетип, улут өнүгөт", — деди Мураталиев.
Ошондой эле ал талкууда сөз болуп жаткан миграция маселесине токтолду.
"Документте жана талкууларда алыста иштеп жүргөн мигранттарды аяшыбыз керек деп айтылууда. Биз аларды аясак, чөнтөгүн карабай, өз мекенинде, жакындарынын жанында иштешине шарт түзүп беришибиз зарыл", — деди адис.
Буга чейин президент Садыр Жапаровдун өлүм чыккан жерде ысырапкерчиликке жол бербөө боюнча жарлыгы жарыяланган. Бул жарлыктын максаты — жарандардын социалдык, экономикалык жашоо деңгээлин жогорулатуу экени айтылган. Ошондой эле диний ырым-жырымдарды, үрп-адаттарды жана коомдун руханий абалына терс таасирин тийгизүүчү башка иш-чараларды өткөрүүдө ысырапкорлукту алдын алуу.
Ал эми парламенттик угуу учурунда той-аш жана маркумду узатуу жөрөлгөлөрүндө эреже бузгандарга 150 миң сомго чейин айып салуу сунушталган.
Көп өтпөй Кыргызстандын муфтияты маркумду узатуудагы ысырапкорлукту алдын алуу жөнүндө фатва чыгарды. Анда ислам шариятында маркумду акыркы сапарга узатууда сөөк чыккан үйдө үч күнгө чейин казан асып мал союлбай, тамак берилбей турганы белгиленген.