БИШКЕК, 10-мар. — Sputnik. Кыргыз өкмөтү доллардан баш тартуу тууралуу токтом чыгарып, кредиттерди сом менен гана бериши керек. Бул тууралуу Жогорку Кеңештин депутаты Айсара Абдибаева парламенттин жыйынында билдирди.
Анын айтымында, өлкө мыйзамдары, Улуттук банктын өзүнүн мыйзамында дагы доллар түрүндө кредит берүүгө мүмкүн эместиги, сом менен гана иштөө керектиги жазылган.
"Министрлер кабинети эле бир токтом чыгарып койсо болот. Себеби доллардан баш тартпасак, такыр эле көз каранды болуп калдык. Бардык жашоо-турмушубуз ошого байланышыптыр. Айрыкча кредит алгандарга кыйын болууда. Коммерциялык банктар мыйзамдарга баш ийбей эле доллар менен берип жатат. Ошондуктан өкмөт Улуттук банкты карап отурбастан өздөрүнүн божомолдоруна карап чечим чыгарса. Пандемия маалында башка мамлекеттер бир эле барак токтому менен жарандарынын укугун коргоп койду. Азыр деле өкмөт Украинадагы кырдаалга таянуу менен эле биздин жарандарды коргоп койсо болот", — деди Абдибаева.
Мындай норма менчигинин түрүнө карабай бардык банктарда колдонуларын, бирок ал атамекендик өндүрүш менен алектенген ишкерлерге гана тиешелүү экенин эскертти.
Ошондой эле депутат элдин митингге чыгышын күтпөй ыкчам чараларды кабыл алууга чакырган.
"Мына Россия доллардан баш тартып жатат. Биз деле баш тарталычы, долларсыз деле жашаганбыз да. Убагында 19 цент эле. Азыр чайкоочу, спекулянттарга Кудай берип салды, жумуртканы да долларга шылтап кымбаттатып жатат. Ошондуктан эл качан митингге чыгат экен деп отурбай, өкмөт жол-жобосун карап чараларды көрө берсе болмок", — деди эл өкүлү.
Ал сөзүнүн соңунда дагы доллардан баш тартуу токтомун чыгарууга аракет жасоого чакырды.