Улуттук команда 3-мартта Ирандын тайпасын 13:1 упай менен, 5-мартта Малайзиянын тайпасын 22:1 упай эсеби менен жеңген. 7-мартта Сингапурдун хоккейчилерин ири эсеп менен утуп, кийин жыйынтыктоочу оюнда Кувейттен келген команданы 14:0 менен жеңип, үчүнчү дивизионго көтөрүлдү.
Жыйынтыктоочу оюнду мамлекет башчы Садыр Жапаров да көргөн. Оюн бүткөндө президент өзүнүн атынан бардык команда мүчөлөрүнө, машыктыруучулар курамына жана улуттук кураманын дарыгерлерине акчалай сыйлык тапшырган. Андан соң Жапаров улуттук команданын кийим алмаштыруучу жайына кирип, хоккейчилерди чемпионаттагы ишенимдүү жеңиши менен куттуктап, Кыргызстан командасы III дивизиондо жеңсе, сыйлык үч эсе көп болорун убадалаган.
Белгилей кетсек, төртүнчү дивизиондун командалары арасында хоккей боюнча дүйнө чемпионаты 2022-жылдын 3-8-март күндөрү Бишкек шаарында өттү. Бул республиканын аймагында болгон спорттун олимпиадалык түрү боюнча биринчи дүйнөлүк чемпионат. Турнирге Кыргызстан, Кувейт, Сингапур, Малайзия жана Ирандан беш курама команда катышты.
Тема боюнча: