90-жылдары өлкөдөгү социалдык абалга байланыштуу балдар тиешелүү билим албай, ата-энелер тарбия берүүгө убакыт бөлө албай калган. Мунун кесепети бүгүн билинип жатат. Бул тууралуу Жаныбек Абидетегин Sputnik Кыргызстан радиосунда маек куруп жатып билдирди.
Анын айтымында, балдарды тарбиялап, аларга китеп окуп берүүдө ата-эне жоопкерчиликти ала албай жатат.
"Өлкөдө көйгөйлүү маселе көп. Аны чечүүнүн негизги жолу — билим алуу. 90-жылдары өлкөдөгү социалдык абалга байланыштуу балдар тиешелүү билим албай, ата-энелер тарбия берүүгө убакыт бөлө албай калган. Ага байланыштуу үй-бүлө институту ыдырап, ата-эне баланы тарбиялоодо жоопкерчиликти ала албай жатат. Өспүрүм курактагы бала убактысынын көбүн ата-энесинин жанында өткөрөт, демек, тиешелүү тарбияны ошолор бериши керек. Мисалы, адабият, телеканал, социалдык тармактарды күнөөлөө туура эмес. Ата-эне бала менен көбүрөөк убакыт өткөрүп, үлгү боло тургандай таасир бериши зарыл. Чогуу ойноп, китеп окуп баланын жүрүм-турумун аныкташы керек", — деди Абидетегин.
Ошондой эле адис кыргызстандык өспүрүмдөр маалыматтын көбүн орус тилдүү булактардан алып, кыргыз тили четте калганын кошумчалады.