БИШКЕК, 6-мар. — Sputnik. Грузияда ветеринарлар кеңсе бычагын жутуп алган көк жоруну сактап калышты, тагыраагы, миздүү буюмду анын жемсөөсүнөн алып чыгышты. Бул туурасында "National Geographic Россия" сайты жазды.
Окуя Грузияда болгон. Мцхет районундагы Ничбиси айылынын жашоочусу жорунун жерден уча албай алсырап жатканын көрүп тиешелүү жакка кайрылган.
Айлана-чөйрөнү коргоо боюнча департаменттин кызматкерлери аны борбор калаадагы — Тбилиссидеги зоопаркка алып кетишкен. Балта жутардын эмнеге мындай алсыз болуп жатканын билүү максатында рентгенге тартышкан. Аппарат анын жемсөөсүнөн бүктөлгөн эмес, мизи чыгып турган кеңсе бычагын көрсөткөн.
Бир нече ветеринар канаттууну сактап калуу үчүн консилиум өткөргөн. Операция кылбай, алар бычакты оозу аркылуу алып чыгууга киришкен. Жыйынтыгында адистердин аракети ийгиликтүү болуп, миздүү буюмду сууруп чыгышкан.
Маалыматта учурда балта жутардын реабилитация болушу үчүн борбор калаадагы зоопаркта багылып жаткандыгы, толук айыгып кеткенден кийин эркиндикке кое берилери жазылган. Ал эми миздүү буюмду жорунун кайдан жутуп алганы жазылган эмес.
Көк жору (балта жутар) дүйнөнүн көп өлкөлөрүндө жашайт. Россияда, Кавказда, Алтайда кездешет. Кыргызстанда да бар. Бир топ эле көлөмдүү куш, канатын күүлөгөндө 75-80 сантиметрге жетет.