Манаста "айран калуу" деген түшүнүк эстен тануу, таң калуу дегенди түшүндүрөт. Бул тууралуу Нурбек Талантбеков Sputnik Кыргызстан радиосунун "Көөнө сөз" рубрикасында билдирди.
Анын айтымында, учурда кыргыз тилдүүлөрдүн көпчүлүгү чалып сүйлөп калды.
"Айран калуу деген түшүнүк бар. Аны түз мааниде, ак төгүлүп же айран бир жерде калыптыр деп түшүнбөш керек. Эпосто дөөнү, жин перини көрүп жүрөгү түшүп, үрөйү учкан учурларда "айран калып башым таң" деген саптар менен сүрөттөлөт. Мындан улам "айран калуу" дегенди эстен тануу, таң калуу деп түшүнсө болот. Учурда көптөгөн кыргыз тилдүүлөр башка тилди аралаштырып, чалып сүйлөшүүдө. Маселен, жаштар айран калуу дегендин ордуна "мандраж болдум" дешет. Бул жакшы көрүнүш эмес. Ошондуктан сөз байлыкты көбөйтүп, бир тилде так жана таза сүйлөө үчүн көөнө сөздөрдүн маанисин биле жүрүү зарыл", — деди Талантбеков.
Ошондой эле ал көөнө сөздөр тилдин көркөмдүгүн арттырарын кошумчалады.