Өтүк ултарган аксакалдар бүгүнкү күндө жокко эсе. Ал техниканы өздөштүрүп, колго алган бир да киши болгон жок. Бул тууралуу Дөөлөт Рысбаев Sputnik Кыргызстан радиосунда маек куруп жатып билдирди.
Анын айтымында, Улуттук тарых музейиндеги 19-кылымдын башында сакталып калган ултарылган өтүктү бир дагы чебер кайталап, өзүндөй кылып жасай алган эмес.
"Бүгүнкү күндө өтүк ултаруу унутта калды. Бул өнөрдү аркалаган аксакалдар дээрлик жокко эсе. Улуттук тарых музейинде 19-кылымдын башында сакталып калган ултарылган өтүктөр турат. Өтүк ултаруунун ыкмасы татаал, ал техниканы өздөштүрүп колго алган бир да киши болгон жок. Өтүктү бутка кийгенде кыяктай болуп чоюлуп, кайра калыбына келгендей ыкма колдонулган. Четтен келген окумуштуулар кыргыздар терини иштете албайт деген ойду жазмалардан кездештирүүгө болот. Бирок аталарыбыз терини көнгө жеткире жасаган. Көн — эң жука кездеме. Тактап айтканда, терини жибек сымал желбирегендей абалга жеткирип жасашкан", — деди Рысбаев.
Ошондой эле адис байыркы кыргыздар өтүккө коңгуроо салып жасап, өзгөчөлүктөрдү кошо билгендиги менен айырмалангандыгын кошумчалады.
Белгилей кетсек, Ак калпак жана улуттук кийим күнүнө карата Бишкекте биринчи жолу "Кыргыздардын салттуу кийими" аттуу фестиваль өтөт. Фестиваль 5-март күнү саат 10:00дө "Ынтымак-2" паркында болот.