БИШКЕК, 4-мар. — Sputnik. Улуттук банк доллардын курсунун көтөрүлүшү боюнча түшүндүрмө берди.
Өткөн бейшемби, 24-февралда, Кыргызстанда доллар 10 сомго кымбаттап, тагыраагы, 95 сомго көтөрүлгөн. Андан кийин 90 сомго түшүп, бирок дүйшөмбүдөн (28-февралдан) тарта кайрадан көтөрүлгөн. Бүгүнкү күнгө чейин 97 сомдун чегинде кармалып турганы менен эртең менен 98 сомго, андан кийин бир катар банктарда 99га чыкты. Азыр 98,5 сомдон сатылууда.
"Учурдагы геосаясий абалдан улам тышкы финансы рыногунда Кыргызстандын соода-экономикалык өнөктөшү деп эсептелген өлкөлөрдүн валюталарынын бир калыпта турбай улам өйдө-ылдый болушу байкалууда", — деп айтылган маалыматта.
Улуттук банктан Кыргызстанда өзгөрүлмөлүү алмашуу курсу режими колдонуларын, мунун алкагында динамика ички валюта рыногунда чет өлкө валютасына болгон суроо-талап менен сунуштун балансынын негизинде аныкталарын билдиришти.
"Азыркы учурда валюта рыногунда чет өлкө валютасына болгон суроо-талап сунуштан ашып жаткандыгы байкалууда. Ушуга байланыштуу Улуттук банк валюта рыногунда өзүнүн катышуусун улантуу менен валюталык интервенцияларды жүргүзүп турат, анткени Улуттук банкта жагдайды текшилөө үчүн зарыл ресурстар менен инструменттер жетиштүү", — деп айтылат таратылган маалыматта.
Алар ички валюта рыногуна талдоо жүргүзүп турарын жана жагдайды жөнгө салуу үчүн акча-кредит саясатынын инструменттеринин бардык спектрин колдонуп, зарыл болгон чараларды кабыл алууга даяр экендигин билдиришти.
Россиядагы Украинага байланышкан абалдан кийинки санкциялардан экономикалык кырдаал тез өзгөрүп кетти. Россиянын өзүнөн сырткары бир катар постсоветтик өлкөлөрдө чет элдик бир катар валюталар кескин кымбаттады. Бул 24-февралда башталды. Абалдан улам Улуттук банк бир нече кадам жасап, өлкөдөгү эсептик ченди да жогорулатты.