Марат Жантелиев 1961-жылы 3-мартта Нарын облусунун Кара-Кужур өрөөнүндөгү Лахол айылында туулган. Элеттеги орто мектепти аяктаган соң үйдөгүлөрдүн каршылыгына карабай Москвадагы Бүткүл союздук кинематографисттер институтуна (ВГИК) тапшырып, аны артыкчылык менен бүтүргөн. Кийин белгилүү кинорежиссёр Төлөмүш Океевдин "Ак илбирстин тукуму" тасмасында Саяк аттуу оорулуу баланын ролун аткарып тушоосу кесилген. Андан соң бир катар кинокартиналарда образ жаратып, эл арасында тааныла баштаган.
Актёр Бакен Кыдыкеева атындагы жаш көрүүчүлөр театрында 20 жылдан ашык эмгектенген. КРдин эмгек сиңирген артисти өзүнүн эмгек жолунда театр менен кинону бирге алып жүргөн. Сахнада Бопуш деген ылакап ат менен таанылса, тасмада селсаяк (бомж), Каке, Саякбай болуп бир топ тасмаларды көрккө бөлөгөн.
Жеке жашоосунда жубайы Асел Дооронбаева экөө бир уул, эки кызды тарбиялап өстүргөн.
Марат Жантелиев 2020-жылдын 9-июнунда оорудан улам көз жумуп, сөөгү "Ала-Арча" көрүстөнүнө коюлган. Актёрдун көзү тирүү болгондо быйыл 61 жашка толмок.