БИШКЕК, 2-мар. — Sputnik. Евробиримдик SWIFT системасынан жети банкты өчүрүү боюнча чечим кабыл алды. Бул туурасында РИА Новости кабарлады.
Аталган тизмеге ВТБ, "Россия", "Открытие", Новикомбанк, Промсвязьбанк, Совкомбанк жана ВЭБ.РФ банктары кирген.
ВТБ банкынан бул боюнча комментарий беришкен.
"Бул системадан өчүрүү Россияда кардарларды тейлөөгө жана корпоративдик кардарлардын эл аралык которуулары боюнча кырдаалга таасирин тийгизбейт", — деп айтышты банктан.
Россия президенти Владимир Путин 21-февралда Луганск жана Донецк элдик республикаларын таануу боюнча жарлыкка кол койгон. Алар 2014-жылы өздөрүн Киевден көз карандысызбыз деп жарыялаган. 24-февралдын таңынан тарта Россия Украинаны куралсыздандыруу боюнча операцияны баштады. Бул абалды курчутуп, Батыш мамлекеттери жана АКШ тарабынан санкциялар толкунун жаратты. Алардын бири — россиялык банктарды SWIFT системасынан өчүрүү чечими болгон. Ал бир нече күндөн бери айтылып келе жатып, бүгүн конкреттүү банктардын аты аталды.
Ал эми президент Владимир Путин "АКШ жана ага кошулган чет элдик мамлекеттердин, эл аралык уюмдардын кастык мамилесине байланыштуу атайын экономикалык чараларды колдонуу боюнча" жарлыкка кол койгон. Россиянын Борбордук банкы Директорлор кеңешин жыйынга чогултуп, негизги ченди 20 пайызга чыгаруу чечимин кабыл алган.