Кинорежиссёр Эрнест Абдыжапаров 1961-жылы 27-февралда Фрунзе шаарында төрөлүп, балалыгы Нарын жана Ысык-Көл облустарында өткөн. Мектепти аяктаган соң музыкалык окуу жайда окуп, 1983-жылы борбор калаадагы педагогикалык институтун бүтүргөн. Андан соң беш жылдай орус тили жана адабияты сабагы боюнча мугалим болгон.
Абдыжапаров 27 жашында айылдагы мектептен кетип, борбор калаага кино менен алектенгени келген. 1988-жылдан баштап режиссёрдун ассистенти, администратор болуп иштеп, 1993-жылы алгачкы даректүү тасмасын жараткан. Кийинки жылдары "Кыргызфильмде" редактор, сценарист, режиссёр болуп иштеген.
Кинематографист толук метраждуу ондон ашык, кыска метраждуу 30га жакын фильмдин автору. Алардын ичинде "Боз салкын", "Айыл өкмөтү", "Таранчы", "Такси жана телефон", "Гаишники", "Саякбай" тасмасы элдин купулуна толуп, бир топ эл аралык фестивалдарды багындырган. Абдыжапаров убагында каржынын жоктугунан бир нече жолу жашаган үйүн күрөөгө коюп фильм тарткан жайы бар.
Сценаристтин тун кызы Гүлкайыр Америкада иштейт. Ал эми уулу Санжар келинчеги менен кино жаатында эмгектенсе, дагы бир кызы Перизат жолдошу менен атасынын жардамчысы. Ал эми кичүү кызы ата-энеси менен айылда жашап, мектепте билим алат.
Тема боюнча: