БИШКЕК, 26-фев. — Sputnik. Жалал-Абадда кар көчкү алдында калган дагы бир адамдын сөөгү табылганын ӨКМдин маалымат кызматы кабарлады.
Ага ылайык, табылган адам кытай жараны. Эске салсак, буга чейин саат 12:30дар чамасында куткаруучулар 24 жаштагы кыргыз жаранынын сөөгүн табышкан.
"Бүгүн издөө жана унаа жолду тазалоо ишинин натыйжасында саат 15:30дарда бир кытай жаранынын (аты-жөнү такталууда) сөөгү табылды. Учурда дагы эки кытай жаранын издөө иштери уланып жатат", — деп айтылат маалыматта.
Эскерте кетсек, Түндүк — Түштүк (Балыкчы — Казарман — Жалал-Абад) альтернативалуу унаа жолунун 332 жана 338-чакырымдарында кар көчкү түшүп, Казарманды карай жолду тазалап жаткан төрт адамды техникасы менен көчкү басып калган. Алардын бирөө кыргыз жараны, үчөө кытай жараны экени айтылган. Учурда экөөнүн сөөгү табылды.