БИШКЕК, 21-фев. — Sputnik. Франция президенти Эммануэль Макрондун саммит өткөрүү сунушун Россия лидери Владимир Путин жана АКШнын башчысы Жозеф Байден кабыл алды. Бул тууралуу Елисей сарайы билдиргенин РИА Новости жазды.
"Ал (Макрон) президенттер Байден менен Путинге эл аралык саммит өткөрүүнү сунуштады, андан соң коопсуздук жана стратегиялык туруктуулук маселеси жаатында кызыкдар болгон бардык тараптардын кездешүү зарылдыгын айтты. Байден менен Путин саммит боюнча мындай идеяны жалпы жонунан колдошту", — деп айтылат маалыматта.
Саммит "эгерде Россия Украинага кол салбаса" гана өтөрүн билдиришти. Ал эми Москва батыш ага таңуулап жаткан коңшу өлкөгө кол салуу боюнча айткандарын четке какканы айтылган.
Бул иш-чаранын күн тартибин АКШнын мамлекеттик катчысы Энтони Блинкен жана Россиянын тышкы иштер министри Сергей Лавров Елисей сарайында 24-февралда өтүүчү жолугушууда даярдай тургандыгы айтылды.
Ак үйдүн өкүлү Жен Псаки Париждин америкалык лидердин ниети тууралуу билдирген маалыматын тастыктады.
"Президент Байден эгерде кол салуу болбосо, Россия лидери Путин менен кайрадан жолугушууга макулдугун билдирди", — деди ал.
Эске салсак, 20-февралда Владимир Путин Макрон менен телефон аркылуу сүйлөшкөн. Ал Париждин демилгеси менен болгон.
Маалыматтарга караганда, сүйлөшүү 1 саат 45 мүнөткө созулган. Елисей сарайы эки өлкөнүн лидерлери кырдаалды ырбатып жиберүүдөн алыс болуу, тобокелдикти азайтуу жана Украинанын чыгышында тынчтыкты сактоо боюнча милдеттенмелерди өздөрүнө алгандыгын билдирген.
Россиянын Украинага чагымчылдык иштерди даярдап жатат деген имиштер орустардын аскерлери машыгуулардан жайгашкан орундарына кайтып баргандан кийин деле тыйылбай жатат. Россиянын коргоо министри Сергей Шойгу Путин менен 14-февралдагы жолугушуусунда "машыгуулардын бир бөлүгү жакынкы аралыкта аягына чыгарын билдирген". Эртеси аталган министрликтин расмий өкүлү генерал-майор Игорь Конашенков түштүк жана батыш аскер округдарынын аскерлери кайтып кете баштагандыгын кабарлаган.
Москва "Россиянын Украинанын айланасындагы кырдаалды чыңалтуу боюнча планын" ар дайым четке кагып келет. Эч кимге кооптуулук жаратпастыгын жана алардын дарегине айтылып жаткан нерселер НАТОнун өзүнүн техникаларын Россиянын чек арасына жакыныраак жайгаштыруу шылтоосу экендигин билдирүүдө. Лавров буга чейин Москва чатакты шарттоочу кырдаалды эч качан түзбөй тургандыгын айткан