БИШКЕК, 12-фев. — Sputnik. Былтыр декабрда Москвада өрттөн жабыркаган кыргызстандыктардын азыркы абалы тууралуу Кыргызстандын Россиядагы элчилиги маалымат берди.
Билдирмеге ылайык, 2021-жылдын 28-декабрында саат 17:26 чамасында Москва шаарынын Троицкий жана Новомосковский административдик райондоруна караштуу Коммунарка аймагында чарба жүргүзүүчү субъектинин жыгачтан жасалган турак жай бөлмөсүндө өрт чыккан. Анын кесепетинен беш кыргызстандык жабыркаган.
Элчиликтин кызматкерлери окуя болгон жерге барып, Россиянын аймактык укук коргоо жана жергиликтүү бийлик органдарынын өкүлдөрү менен жолугушууларды өткөргөн. Алдын ала текшерүүнүн жыйынтыгында өрт бөлмөдөгү жылытуучу радиатордун жарылуусунан улам чыккандыгы аныкталган.
"Жабыркагандардын ичинен 40 жаштагы А.А.Ж. көмүр кычкыл газына ууланып каза болгон. 40 жаштагы дагы бир кыргызстандык — А. А. Москвадагы Склифосовский атындагы Тез жардам илим-изилдөө институтуна көптөгөн термикалык күйүк менен жаткырылган. Калган жарандары анча жабыркаган эмес, учурда Россиянын башка объектилеринде иштөөсүн улантып жатышат", — деп жазылган маалыматта.
Элчиликтин жардамы менен өрттөн жабыркаган кыргызстандыктарга иш берүүчү тарабынан бериле турган эмгек акы дароо төлөнгөнү кошумчаланды. Ошондой эле А.А.Ж. аттуу жарандын сөөгүн жөнөтүү жумуш берүүчүнүн эсебинен ишке ашырылган. Мындан тышкары, ооруканага жаткан кыргызстандыкты дарылоо жана ден соолугун калыбына келтирүү үчүн компенсацияны этабы менен төлөп берүү макулдашылган.
Москвага күйөөсүн кароо үчүн келген ал жарандын жубайы элчиликке кайрылып, өрт кырсыгы боюнча өзүн кызыктырган бардык суроолорго жооп алганы айтылган.
"Бирок элчилик анын иш берүүчүлөрдүн аракети менен полиция окуя боюнча тергөө амалдарын токтоткону, элчилик жардам берүүдөн баш тартканы, медициналык мекеменин дарыгерлери акча төлөнбөгөн учурда палатаны бошотууну талап кылгандыгы тууралуу билдирүүсүн төгүндөйт", — деп жазылган билдирмеде.
Элчиликтин айтымында, учурда аталган факт боюнча Россиянын мамлекеттик тергөө комитетинин Москва шаарынын Троицкий жана Новомосковский административдик райондору боюнча тергөө бөлүмү тарабынан текшерүү иштери жүрүүдө. Анын жыйынтыгында юридикалык баа берилип, процессуалдык чечимдер кабыл алынат.
Элчилик бул факт боюнча соттук териштирүүлөр аяктаганга чейин бардык жабырлануучуларга укуктук жана юридикалык колдоо көрсөтүүгө даяр экенин билдирген. Мындан сырткары, документтери күйүп кеткен кыргызстандык төрт кишиге алардын ким экендигин тастыктаган документ берилген. Элчиликтин комиссиясы өрттөн каза болгон жарандын сөөгүн мекенине алып кетүү үчүн жакындарына бир жолку компенсация төлөп берүү чечимин чыгарганын кошумчалашкан.