БИШКЕК, 10-фев. — Sputnik. Жалал-Абаддагы "Майлы-Суу" лампа заводунун иши жанданат. Бул тууралуу президенттин Жалал-Абад облусундагы ыйгарым укуктуу өкүлчүлүгүнөн билдирди.
Аталган жайга облус жетекчиси Абсаттар Сыргабаев барып, ишмердүүлүгү жана көйгөйлөрү менен жеринен таанышып чыкты.
“Азыркы учурда "Майлы-Суу" лампа заводунун жалпы мүмкүнчүлүктөрү менен 30 пайыздык жумуш аткарылып жатат. Негизги көйгөй өндүрүлгөн лампаларды сатуудагы кыйынчылыктар болуп жатат. Ага байланыштуу жумушчулардын жана өндүрүштүн ыргагы басаңдаган”, — деп айтылат билдирүүдө.
"Майлы-Суу" лампа заводунун курулушу 1964-жылы башталган. Ал эми 1967-жылы алгачкы өндүрүмүн чыгара баштаса, 1974-жылы 1 млрд. электр лампаларын өндүрүүгө жетишкен.
Азыркы учурда электр лампочкаларынын сапаты жогору 40ка жакын түрү чыгарылып, 350 кызматкер эмгектенет. Завод 2021-жылы 62 млн. 500 миң даана лампа даярдаган.
Жалал-Абад облусунун Майлы-Суу шаарында 26 миңдей калк жашайт.