БИШКЕК, 7-фев. — Sputnik. Ысык-Көл облусунун аймагында кымбат турган кыймылсыз мүлктү мамлекеттин карамагынан менчикке мыйзамсыз чыгарып берген коррупциялык схема аныкталды. Бул туурасында УКМКнын маалымат кызматынан кабарлашты.
2010-жылдын май айында "Ысык-Көл-Аврора" санаторийинин аймагында жайгашкан 97 кымбат баалуу кыймылсыз мүлкү бар 10 гектар жер тилкеси мамлекеттин карамагына алынган. Бирок кийинчерээк бул объектилердин ичинен 13 гана батир иш жүзүндө мамлекетке өтүп, калган 56 батир жана 27 коттедж татаал коррупциялык схемаларды түзүү жолу менен мыйзамсыз түрдө менчик структуралардын колуна чыгарылып кеткен.
УКМК булар Ысык-Көл районунун жана облусунун, Бишкек шаарынын, Чүй жана Ысык-Көл облустарынын райондор аралык сотторунун, Жогорку соттун судьяларынын, президенттик аппараттын, Мамлекеттик мүлк фондунун, Мамлекеттик каттоо кызматынын жооптуу кызматкерлеринин катышуусу менен болгондугун билдирди.
Тергөөнүн жүрүшүндө аталган кыймылсыз мүлктү мамлекеттин карамагынан чыгаруунун уюштуруучусу болуп "А-А ПМК" ЖАКнын мурдагы башкы директору Ч.В.Ю., ошондой эле анын жактоочусу жана ал менен аффилиацияланган башка адамдар экендиги аныкталган.
"Бул топ өздөрүнүн кылмыштуу оюн ишке ашыруу үчүн мамлекеттик, укук коргоо жана сот органдарынын жогорку кызматтагы адамдарына акча жана кыймылсыз мүлктөрдү өткөрүп берүү жолу менен колдоо тапканы тууралуу тергөө тиешелүү далилдерди тапты", — деп айтылган маалыматта.
2022-жылдын 5-февралында аталган адамдардын тобуна кыймылсыз мүлк объектилеринин бир бөлүгүн легалдаштырууда жасалма жарандык-укуктук келишимдерди түзүү жолу менен түздөн-түз көмөк көрсөткөн "СКД" ЖЧКсынын жетекчиси К.А.В. кармалган.
Бүгүн, 2022-жылдын 7-февралында, ага карата Бишкек шаарынын Биринчи май райондук соту тарабынан тергөө учурунда камакка алуу түрүндө чечим кабыл алынган.
Улуттук коопсуздук боюнча мамлекеттик комитет бул коррупциялык схеманы түзүүнүн кесепетинен мамлекеттин кызыкчылыгына өзгөчө ири өлчөмдөгү (Ысык-Көл облусунун рекреациялык зонасында жайгашкан кымбат кыймылсыз мүлк мамлекеттик менчиктен мыйзамсыз чыгарылып) зыян келтирилгенин белгиледи.
"Учурда аталган иш боюнча жогорудагы схеманын төрт катышуучусу кылмыш жоопкерчилигине тартылган. Анын ичинен үчөө камакта, тергөө жүрүп жатат жана жакынкы арада кылмыш иши боюнча башка айыпталуучуларга карата кимдин аракетинде кылмыштын курамы аныкталса, тиешелүү процессуалдык чечимдер чыгарылат", – деп билдирди УКМК.
Улуттук коопсуздук мамлекеттик комитети бул ишти мамлекеттик бийлик органдарындагы коррупциялык көрүнүштөрдү аныктоо, алдын алуу жана бөгөт коюу боюнча жүргүзүлүп жаткан аракеттердин алкагында таап чыккандыгын билдирди.