БИШКЕК, 7-фев. — Sputnik. УКМК жарандарды соттун чечимисиз тыңшап, жеке менчик жайларына жашыруун камера коюуну сунуштады.
Бүгүн Жогорку Кеңештин Эл аралык иштер, коргоо, коопсуздук жана миграция комитети "Кыргыз Республикасынын улуттук коопсуздук органдары жөнүндө" мыйзам долбоорун биринчи окууда карады.
Жыйында депутат Айбек Осмонов сунушталган мыйзамдын 11-беренесинин 2-бөлүгүндө "телефон сүйлөшүүлөрдү тыңшоо, менчик жерге камера коюу укуктук кызмат адамынын жүйөлүү токтомунун негизинде гана аткарылат" деп жазылганын белгиледи.
"Конституциянын 29-беренесинин 3-бөлүгүндө бул укуктарды чектөөгө мыйзамга ылайык жана сот чечиминин негизинде гана жол берилери жазылган. Демек, бири-бирине каршы келип жатат. Ушуну өзгөртүп коюңуздар", — деди Осмонов.
Эл өкүлү Адахан Мадумаров да бул сунуш Баш мыйзамга каршы келерин айтып, четке кагууга чакырды.
"Конституциянын 29-беренесинин 1-2-бөлүктөрүндө ар бир адамдын жеке жашоосунун кол тийбестигин айтып жатат. Бизде эгер мыйзамдар каршы келип калса, Баш мыйзам түз иштейт деген норма бар. Иштебеген мыйзам долбоорун эмне көтөрүп келесиңер же түшүнүк менен жашайбызбы. Сиздердин долбоордо "биз жашыруун түрдө сүрөткө тартып да, жазып да алабыз, керек болсо башка нерсеге да бара алабыз" деп турат. Андай болбойт. Адамдардын ар-намысы, кат алышуусу, сүйлөшүүсү корголушу керек", — деди Мадумаров.
Ошондой эле ал эгер бул демилге өтө турган болсо, айланып келип депутаттардын өзүнө каршы иштеши мүмкүндүгүн айтты.
УКМКнын төрагасынын орун басары Рустам Мамасадыков учурда эксперттер иштеп жатканын айтып, экинчи окууга чейин өзгөртүүлөр киргизилерин билдирди.
Натыйжада комитет сунуш, пикирлерди эске алуу менен мыйзам долбоорун биринчи окууда негиз катары кабыл алууга макул болду.
Аталган мыйзам долбоору ачык булактарга жарыялана элек.