БИШКЕК, 5-фев. — Sputnik. Өзгөчө кырдаалдар министрлигинин Ош шаары боюнча башкармалыгынын куткаруу тобунун командири, лейтенант Нурбек Жумабаев кызматкерлер кандай учурда бекилип калган эшиктерди ачып бере турганын айтып берди.
Министрлик белгилегендей, бекилип калган эшикти ачууга жардам сураган чакыруулар көп түшөт.
Биринчиден, ал үйдөгү кишиге коркунуч жаралбаса жакындары менен байланышып, ачкыч сураганы оң. Эгер бул мүмкүн болбосо, эшикти ачкан акы төлөнүүчү кызмат чакыруу керек.
Эгерде коркунуч жаралса, дароо 112 кызматына чалуу зарыл (же кошуналардан чалууну сураныңыз). Андан кийин диспетчерге эмне болгонун жана эмнеге куткаруучулардын жардамына муктаж экениңизди айтыңыз.
"Куткаруу кызматы бекилип калган эшикти адамдын өмүрүнө коркунуч туудурган учурларда же кичинекей балдар, майыптар же кары-картаңдар камалып калганда гана ачышат", — деп жазылган маалыматта.
Куткаруучулардын эшикти ачуусу үчүн үй ээсинин паспорту же менчик укугун тастыктаган документи, ал болбосо кошуна жашаган эки жаран өздүгүн тастыктаган паспорт менен болушу керек.