БИШКЕК, 4-фев. — Sputnik. Ысык-Көл облусунун Ак-Суу районундагы мектептин курулушу боюнча коррупциялык иштерге шектелип кызмат адамдары кармалды. Бул тууралуу Башкы прокуратурадан билдирди.
Чолпон айылындагы Калиев атындагы 225 орундуу орто мектептин имараты 2018-жылдын октябрь айында эксплуатацияга берилген. Куруу иштери боюнча облустук Капиталдык курулуш башкармалыгы менен "А.С." жана "Т.К." ЖЧКларынын ортосунда 62 миллион 296 миң сомдук келишим түзүлгөн.
"Облустук прокуратура тарабынан жүргүзүлгөн текшерүүдө Капиталдык курулуш башкармалыгынын кызмат адамдары подрядчылар менен алдын ала макулдашып, аткарылган иштердин актыларына айрым жумуштардын наркын жогорулатылган баада жана иш жүзүндө аткарылбаган жумуштарды киргизишкен. Жыйынтыгында 3 миллион 224 миң 493 сомду өздөрүнө ыйгарып алышкандыгы аныкталды", — деп айтылат прокуратуранын билдирүүсүндө.
Аталган факты боюнча Кылмыш-жаза кодексинин 337 ("Кызмат абалын кыянаттык менен пайдалануу"), 210 ("Ишенип берилген мүлктү ыйгарып алуу же коротуу") жана 346-беренелери ("Кызматтык жасалмачылык") менен кылмыш иши козголуп, тергөө аракеттери жүргүзүлүүдө.