БИШКЕК, 4-фев. — Sputnik. Улуттук госпиталда 30 орундуу травматология бөлүмү ачылат. Бул тууралуу саламаттык сактоо министри Алымкадыр Бейшеналиев журналисттерге маалымат жыйын өткөрүп жатып айтты.
"Учурда буйрук даярдалууда. Травматологиялык профилдеги бейтаптарды кабыл алууну жандандырууну пландап жатабыз. Улуттук госпиталда жогорку класстагы кадрлар жетиштүү", — деди министр.
Маалымат жыйында министр Бишкек травматология жана ортопедия илим изилдөө борбору жети жыл мурун жоюлганын, мекеменин директору Сабырбек Жумабеков мыйзамсыз иштеп келгенин белгилеген. Бейшеналиевдин айтымында, Жумабеков бул кылгандары үчүн жооп бериши керек.
Буга чейин Саламаттык сактоо министрлиги Бишкек травматология жана ортопедия илим изилдөө борбору Шаардык клиникалык тез жардам ооруканасы болуп кайра түзүлөрүн кабарлаган. Көп өтпөй аталган борбордун жетекчиси, профессор Сабырбек Жумабеков мындай өзгөртүүнүн зыяндан башка пайдасы жок экенин билдирген. Дарыгер "бул жай оорукана гана эмес, илимий борбор болгондуктан чет өлкөлүк өнөктөштөр ошол даражасына карап бизди тааныйт, сыйлайт жана эсептешет" деген пикирин айткан.