БИШКЕК, 4-фев. — Sputnik. Бишкек травматология жана ортопедия илим изилдөө борборунда буга чейин иштеп келген дарыгерлерди алып калабыз, жети жылдан бери алып келген наамдары дагы сакталат. Бул тууралуу саламаттык сактоо министри Алымкадыр Бейшеналиев журналисттерге маалымат жыйын өткөрүп жатып айтты.
"Жумабековго бир жылдан бери айтып келдим. Борбор жети жылдан бери документ жүзүндө жок. Мындай жерде иштеп жаткан башка дарыгерлерге боорум ооруйт. Бирок алар кыргыздын жигиттери, биз аларды алып калабыз. Наамдары дагы сакталат. Ооруканадан Жумабековдун тууган-туушкандары гана кетет", — деди министр.
Буга чейин Саламаттык сактоо министрлиги Бишкек травматология жана ортопедия илим изилдөө борбору Шаардык клиникалык тез жардам ооруканасы болуп кайра түзүлөрүн кабарлаган. Көп өтпөй аталган борбордун жетекчиси, профессор Сабырбек Жумабеков мындай өзгөртүүнүн зыяндан башка пайдасы жок экенин билдирген. Дарыгер "бул жай оорукана гана эмес, илимий борбор болгондуктан чет өлкөлүк өнөктөштөр ошол даражасына карап бизди тааныйт, сыйлайт жана эсептешет" деген пикирин айткан.
Ал эми министр борбор 2015-жылы эле документ түрүндө жабылганын, ошондон бери баары мыйзамсыз иштеп келгенин айтты.