БИШКЕК, 2-фев. — Sputnik. Россиядагы Интернет технологиялары аймактык борбору (РОЦИТ) жергиликтүү калк арасында сурамжылоо жүргүзүп, чет элдик ири компаниялар мамлекеттин мыйзамдарын аткарганы канчалык маанилүү экени боюнча оюн укту. Жыйынтыгы аталган борбордун сайтына жарыяланды.
Сурамжылоо 18-25-январь күндөрү жүргүзүлүп, ага 18 жаштан жогору 1 890 россиялык катышкан.
Аларга чет элдик компаниялар "жерге түшүрүү" мыйзамын (закон о "приземлении") канчалык аткарышы керек деген суроо берилди. "Жерге түшүрүү" мыйзамы маалымат ресурстары менен иштеген, күн сайын жарым миллиондон ашык россиялыктар кызматын пайдаланган чет элдик IT-компанияларга тиешелүү. Талапка ылайык, алар юридикалык тарап катары Россиянын аймагында каттоодон өтүп, филиалын ачышы керек. Ошондой эле Роскомнадзор мекемесинин расмий сайтында жеке кабинети болушу шарт. Мындан тышкары, Россиянын жарандары кайрылып жооп ала турган электрондук кайрылууну өз ресурсуна жарыялашы зарыл.
Суралгандардын жарымы (46,9 пайызы) мыйзамдын күчүнө киргенин билет. 47,9 пайызы мыйзамды колдойт. 22,5 пайызы ага каршы экенин билдирип, 29,6 пайызы эч кандай жооп бере алган жок.
"Анткен менен респонденттердин 67 пайызы Россиянын аймагында иштеген чет элдик IT-компаниялар жергиликтүү мыйзамды аткарбаса жооп бериши керек деп эсептейт. Богону 13 пайызы мыйзамды жактыра берген жок. Ал эми 19,9 пайызы жооп бергиси келбеди", — деп айтылат кабарда.
Сурамжылангандардын 55 пайызы сөз болуп жаткан мыйзамдын үч пунктун туура деп эсептейт. Мисалы, жарымынан көбү чет элдик компаниялар Россияда өкүлчүлүгүн ачышы керек деген пикирге кошулат. Ал эми 58 пайызы Россиянын жарандары кайрылып жооп ала турган электрондук кайрылууну өз ресурсуна жарыялап, Роскомнадзор мекемесинин расмий сайтында жеке кабинети болушу зарыл деген ойдо.
"Сурамжылоого катышкандардын 84 пайызы Россияда иштеп киреше таап жаткан чет элдик ишканалар улуттук мыйзамдарды кынтыксыз аткарышы керек деп эсептейт", — деди РОЦИТ жетекчиси Рустам Сагдатулин.
Ошондой эле ал респонденттердин 67 пайызы мыйзам бузуучу компаниялар катуу жазага тартылышы керек деген пикирде экенин кошумчалады.