БИШКЕК, 30-янв. — Sputnik. Саламаттык сактоо министрлиги бала COVID-19 менен ооруп калса эмне кылуу керектигин айтып берди.
Сунуштамалар Коронавирус менен күрөшүү боюнча республикалык штабдын Telegram-каналына чыкты.
бала ооруп жатса бала бакчага, мектепке жибербей үйдө алып калыңыз;
жашаган жериңиздеги поликлиниканын дарыгерлерине чалыңыз;
медиктердин ооруну аныктоо жана дарылоо боюнча сунуштарын так аткарыңыз;
өз алдынча дарылабаңыз;
суюктукту көп ичириңиз (бир килограммга 25 миллилитр туура келет);
дене табын өлчөп туруңуз. Эгерде 38 градуска жетсе жана ашса дене тапты түшүрүүчү дарыларды бериңиз;
баланын акыбалы начарласа 103 номери аркылуу Тез жардам кызматына чалыңыз.
"Эскертүү! Баланы өз алдынча антибиотик менен дарылабаңыз. Аны педиатр-дарыгерлер оорунун белгилери байкалса гана жазып берет", — деп жазылган сунуштамада.
Буга чейин Республикалык штаб коронавирус жана башка вирустук инфекциялар күчөп жатканына байланыштуу кулак-мурун дарыгеринин (ЛОР) сунуштамалары менен бөлүшкөн.