БИШКЕК, 27-янв. — Sputnik. Кыргыз-тажик чек арасындагы атышуудан төрт кыргызстандык аскер жаракат алды. Бул туурасында өлкөнүн Саламаттык сактоо министрлиги билдирди.
Ведомствонун Баткен облусундагы координатору Арзыбек Бөрүбековдун ыкчам маалыматы боюнча, Көк-Таш айылында төрт аскер жарадар болгон. Аларды тез жардам унаалары менен Баткен облустук үй-бүлөлүк медицина борборуна алып бара жатышат.
Кыргызстандык жоокерлерге атышуу маалында октун чачырандысы тийген. Жарадарлардын абалы тууралуу кийинчерээк кошумча маалымат берилет.