БИШКЕК, 27-янв. — Sputnik. "Түндүк электр" ишканасы Бишкектин 6-9-кичи райондорунда эмне себептен электр жарыгы өчүрүлгөнүн түшүндүрдү.
Кечээ, 26-январда, саат 22:45тер чамасында "Абдыкалыков" подстанциясында жогорку вольттук линиянын иши үзгүлтүккө учураган. Кичи райондун тургундары электр жарыгынын жоктугуна нааразы болуп, "Бишкек сегодня" Telegram-тайпасына жазышкан.
"Түндүк электр" ишканасы белгилегендей, бригада электр кубатын саат 23:55те калыбына келтирген. Мындан тышкары, саат 18:25те "Пиковая-Котельная" подстанциясында жогорку вольттук линия да жабыркап, кесепетинен Ак-Ордо конушу жарыксыз калган. Аталган конушка электр кубаты саат 20:25те берилгени айтылды.
Ишкана абоненттерден келтирген ыңгайсыздык үчүн кечирим сурап, суроо жаралса кол-борбордун 1209, (0702/0772/0556) 00-12-09 телефондоруна чалууну өтүндү.
Эске салсак, 25-январда Кыргызстандын дээрлик бардык аймагы, Казакстан, Өзбекстан жарыксыз калган. Ири авариянын так себеби азырынча белгисиз. Бирок көйгөй Борбор Азиянын бириккен энергошакекчесинде пайда болгону маалым.