БИШКЕК, 26-янв. — Sputnik. Бельгиялык фотографтын Ош облусунан тарткан сүрөтү Travel Photographer of the Year-2021 аттуу эл аралык туристтик сынагынын жеңүүчүсү болду.
Сүрөттүн автору бельгиялык Алан Шредер. Анын айтымында, аламан улакты Өзгөн шаарынын тургуну уулуна элден бата алуу үчүн уюштурган. Кадрдан кыргыздын улуттук баш кийимдерин кийген атчандарды көрүүгө болот. Аламан улак — бул көк бөрүнүн аналогу. Мында ар бир улакчы өзү үчүн ойнойт.
Калыстар тобу сүрөткө жана композициянын өзгөчөлүгүнө жогорку баасын берген.
"Таймашка түшкөн эркектердин бийиктен тартылганы окуяны ачып берген. Жерден тартылганда мындай жыйынтык болмок эмес. Сүрөттүн кайсы тарабын караба, бардык жагында бир нерсе болуп жатканын көрүүгө болот", — деген калыстардын бири.
Travel Photographer of the Year — туристтик сүрөттөрдүн эл аралык сынагы. Конкурска жыл сайын жүздөн ашык мамлекеттен он миңдеген эмгек келип түшөт. Кечээ күнү калыстар тобу 2021-жылдын жеңүүчүсүн аныктады. Адатта сынак Лондондогу ири сүрөт көргөзмө менен аяктайт.
