БИШКЕК, 24-янв. — Sputnik. Кыргызстан Кытай-Кыргызстан-Өзбекстан темир жолунун курулушу боюнча Кытайга документтерди жөнөттү. Бул тууралуу "Кыргыз темир жолу" мамлекеттик ишканасынын директорунун орун басары Дастан Усубакунов "Биринчи радионун" эфиринде айтты.
"Кытай тарапка бардык документтерди жөнөттүк, алар карап, таанышып жатышат. Февралда биздин башкы директор ("Кыргыз темир жолу" мамлекеттик ишканасынын жетекчиси — ред.) Кытайга барат. Темир жол боюнча ал жерден бирдиктүү чечим кабыл алынат деп ойлойбуз. Андан кийин гана коомчулукка толук маалымат беребиз", — деди Усубакунов.
Кытай менен байланыштыра турган аталган темир жол долбоору туурасында алгач 1990-жылдардын ортосунда кеп болгон. Маршруттун бир нече варианттары каралган. Алардын ичинен Кытайдан Кыргызстан, Өзбекстан аркылуу Түркмөнстанга өтүп, андан ары Иранга чыгуу да пландалган. Кытай активдүү түрдө курулушка киришип, темир жана кара жолдордун инфраструктурасын жаңылап баштаган. Темир жол боюнча комиссия түзүү тууралуу биринчи документтерге кол коюлган, ага Кытай, Кыргызстан жана Өзбекстан өкүлдөрү кирген. 2003-жылы долбоордун алгачкы техникалык экономикалык негиздемеси сунушталган. Өзгөчөлүгү — Кыргызстан аркылуу Торугарт ашуусуна чыгып кете турчу маршрут.
Кыргызстан жетекчилиги долбоордун эртерээк ишке ашышына кызыкдарлыгын бир нече ирет көрсөтүп келет. Жакында эле президент Садыр Жапаров Кытай-Кыргызстан-Өзбекстан темир жолунун курулушу Кыргызстандын эле транзиттик мүмкүнчүлүгүн арттырбастан, Борбордук Азия аймагын дүйнөлүк сооданын маанилүү хабдарынын бирине айлантуу үчүн бардык өбөлгөлөр бар экенин белгилеген. Министрлер кабинетинин төрагасы Акылбек Жапаров курулуштун алдында Кытайга барып келиш керектигине токтолгон. Бүгүн Садыр Жапаровдун Пекинге бара тургандыгы маалым болду.