БИШКЕК, 21-янв. — Sputnik. Россиянын "Росатом" мамлекеттик корпорациясы менен Кыргызстандын Энергетика министрлигинин ортосунда КР аймагында төмөн кубаттуулуктагы атомдук станция куруудагы кызматташуу боюнча меморандум кабыл алынды. Бул тууралуу РИА Новости агенттиги жазды.
Документке "Росатом" мекемесинин башкы директору Алексей Лихачев менен энергетика министри Доскул Бекмурзаев кол койгон. Тараптар РИТМ-200Н реактордук орнотмосунун базасында атомдук электр станциясын (АЭС) курууга кызыкдар. Ошондой эле меморандумда Кыргызстанда ядердик инфраструктураны өнүктүрүү жана атомдук энергияны тынчтык жолунда пайдалануу боюнча илимий-техникалык персоналдын квалификациясын жогорулатуу маселелери каралган.
"Экологиялык жактан таза энергия булактары дүйнө жүзү боюнча абдан актуалдуу болуп турат. Кыргызстан дагы бул жаатта четте тургусу келбейт. "Росатом" менен кызматташуу биздин өлкө үчүн энергетика, экономика жана өндүрүштү өнүктүрүүгө жардам берет деп ишенебиз", — деди министрдин орун басары Тилек Айталиев.
Ал эми Лихачев Кыргызстанда АЭС сыяктуу объектинин болушу өлкөнү электр энергиясы жагынан гана көз карандысыз кылбастан, бүткүл Борбор Азия чөлкөмүндө илимий долбоорлордун көбөйүшүнө өбөлгө түзмөкчү.
"Росатом" — россиялык мамлекеттик холдинг, анын курамына атом тармагында иш алып барган 400дөй ишкана кирет. Корпорация Россиядагы бардык атомдук станцияларды башкарат. Холдинг урандын запасы боюнча дүйнөдө экинчи орунда турат.