"Эмгек мигранттары менен иш алып барууда мамлекеттик органдар айрым функцияларын коомдук уюмдарга өткөрүп бериши керек. Тагыраак айтканда, диаспора жана башка жеке уюмдар менен тыгыз иштешип, аларды маалымдар кылуу, айрым учурда мекендештердин укуктарын жана кызыкчылыктарын коргоо сыяктуу иштерди аткарууга мүмкүнчүлүк берилиши учур талабы болуп турат. Анткени элчилик, консулдуктарда кадр тартыштыгы бар. Алар бир учурда бардык багытты камтыган иштерди алып кетиши кыйын. Ошол үчүн мамлекеттик деңгээлде эле айрым функцияларын диаспораларга өткөрүп берсе, мигранттарга көмөк көрсөтүү жана маалымдар кылуу иштери алда канча оперативдүү жана сапаттуу ишке ашмак. Ошондой эле өлкөдөн чыгып жаткан эмгек мигранттарын адистикке ээ кылып, кыска окутуу курстарынан болсо да өткөрүп, даярдап жиберишибиз шарт. Бул багытта биз Австриядагы ICMPD эл аралык миграциялык уюму менен меморандум түзүп келдик. Анын жыйынтыгында Бишкек жана Ош шаарларында миграциялык ресурстук эки бөлүм ачылат. Алар чет өлкөгө чыгып жаткан эмгек мигранттарын маалымат менен камсыз кылуудан тартып, кыска курстарга окутууну колго алат", — деди Рахман.