БИШКЕК, 13-янв. — Sputnik. Бишкекте мектептерди онлайн окутууга өткөрүү эпидемиологиялык абалга жараша чечиле турганын Sputnik агенттигине вице-мэр Виктория Мозгачева билдирди.
Ал Коронавирус менен күрөшүү боюнча республикалык штабдын отуруму күтүлүп жатканын айтты.
"Отурумда Саламаттык сактоо министрлиги өз сунуштарын киргизсе керек. Азыр биз массалык иш-чараларды уюштурбай, жыйындарды онлайн-форматта өткөрүүнү сунуштап жатабыз. Мектептердеги эпидемиологиялык кырдаалга көз салып жатабыз. Бүгүн-эртең байкаштырабыз, ооругандар көп болсо чара көрөбүз", — деди Мозгачева.
Өлкөдө коронавирустун төртүнчү толкуну башталды. Акыркы суткада инфекцияны 742 киши жуктурса, анын 632си Бишкекте катталды.