БИШКЕК, 12-янв. — Sputnik. Бишкектин мамлекеттик Санитардык-эпидемиологиялык көзөмөл борбору жыйындар менен жолугушууларды онлайн-форматта өткөрүүнү сунуштады. Бул тууралуу мэрия билдирди.
Мындай жагдайга коронавирус менен ооругандардын саны көбөйгөнү жана "омикрон" штаммынын аныкталганы себеп болууда. Буга чейин Саламаттык сактоо министрлиги Бишкек "кызыл" зонага киргенин кабарлаган.
Бишкектин бийлиги массалык иш-чараларга катышпай, аралыкты сактап, бет кап кийип, колду тез-тез жууп, имаратты желдетип, антисептик колдонууга чакырат. Ошондой эле вакцина алуу сунушталды.