БИШКЕК, 9-янв. — Sputnik. Кыргызгидромет агенттиги алдыдагы аптага карата аба ырайынын божомолу боюнча маалымат берди.
Ага ылайык, келе жаткан жумада айрым жерлерде жаан, кар жааса, кээ бир аймактарда жаан-чачын күтүлбөйт. Туман түшүп, жолдор тайгак болору айтылды. Бишкекте апта ичи жаан, кар жаабайт.
Чүй, Талас облустары
9-январдан 12-январга чейин жаан-чачын күтүлбөйт. 9-10-январда кээ бир райондордо туман түшүшү ыктымал. 13-январь түнкүсүн күн ачык болгону менен күндүз тоолуу аймактарга кар, өрөөндөргө жаан жаайт деп божомолдонду. 14-15-январда кар тоолуу жерлерге гана түшүшү мүмкүн.
Ош, Жалал-Абад, Баткен облустары
15-январга чейин түштүк аймактарга жаан, кар жаабай турганы айтылды. 9-10-январда туман айрым жерлерге түшүшү мүмкүн.
Тоо этектеринде жана тоолуу райондордо жолдор тайгак болуп, шамалдын багыты өзгөрүлүп ылдамдыгы секундасына 1-6 метрге жетиши күтүлөт.
Нарын, Ысык-Көл облустары
Алдыдагы аптада Ысык-Көлдө кар жаабайт, бирок синоптиктер абанын температурасы -2...-7 градус болорун айтышты. Нарында 13-январга чейин кар жаабайт. 13-14-январда кээ бир жерге кар түшүшү ыктымал. Кыргызгидромет абанын температурасы түнкүсүн -14...-19 градуска чейин жетет деген божомолду берди.