БИШКЕК, 7-янв. — Sputnik. Мектеп психологу Сажира Абдыкаимова Sputnik Кыргызстан агенттигине маек куруп жатып баланын зордук-зомбулукка кабылганын кантип билсе болорун, мындай балдардын мүнөзү кандай өзгөрөрүн түшүндүрдү.
"Эгер балдар менен тыгыз байланышкан адам болсо, ар бир окуучунун маанайына карап туруп эле билип кое алат. Зордук-зомбулукка кабылган балдар эч нерсеге көңүлү жок болуп баштайт. Ойноп-күлбөй түнт болуп кетет. Анан акырын сурап көрсөң зомбулук болгондугу аныкталат. Зомбулук көрсөтүүчү алыс жактан келбейт. Көпчүлүк учурда жакын адамдары эле кылат. Эмнеге анткенин сурасаң тарбиялоо максатында деп айтат", — деди Абдыкаимова.
Ал азыркы Z (зет) мууну болуп саналган балдар мурдагылардай эмес экенин айтып, аларга ата-энелер башкача мамиле кылуусу керектигин белгилеген.
"Санариптештирүү доорундагы балдар бардык нерсе интернеттегидей эле тез болушун каалайт. Аларга жашоодо бир нерсеге жетүү үчүн эмгек, убакыт керек деген өңдүү нерселерди түшүндүрүп берүү абзел. Анан бир гана пикир алышуу, оюн уга билүү керек. Булар манипуляцияга алдырбаган, баарын анализдей ала турган муун. Алардын тилин тапсак, зомбулук да аз болот эле. Азыр балдарды 70-80-жылдардагы ыкмаларды колдонуп тарбиялоого болбойт", — деген адис.
Психолог ата-эне балдарга көбүрөөк мээрим төгүп, алар менен бирге убакыт өткөрүшү керектигин кошумчалаган.
Адистин маегин толугу менен Sputnik Кыргызстан агенттигинен окуй аласыздар.