БИШКЕК, 5-янв. — Sputnik. Президенттин маалымат катчысы Эрбол Султанбаев коңшу өлкөдөгү башаламандыктан улам импорттолгон товарлар кымбатташы мүмкүн деген маалыматтар боюнча комментарий берди.
Ал кыргыз-казак чек арасынан бардык товарлар тоскоолдуксуз өтүп жатканын билдирди.
“Казакстандан импорттолгон товарлардын кымбаттап кетүү кооптуулугу боюнча айта кетсек, учурда кыргыз-казак чек ара өткөрүү бекеттери штаттык режимде иштеп, жүк өтүүдө”, — деди Султанбаев.
Ошондой эле коронавируска байланыштуу чектөөлөрдөн башка бир дагы кошумча чектөөлөр киргизилбегенин кошумчалады.
Буга чейин эксперт Казакстандагы башаламандык токтобосо Кыргызстандын экономикасына таасир этерин билдирген.
Казакстандагы окуялар
Казакстандын түштүк-батышында газдын кымбаттап кетишинен улам жыл жаңырары менен нааразычылык акциялары башталган. Газдын баасы 1-январдан тарта 120 теңгеге чейин көтөрүлгөн. Жашоочулар айлыктын аз экенин эске алуу менен бааны 50-60 теңгеге түшүрүп берүүнү суранышкан.
Бийлик Маңгыстау жана Актөбөдө газдын литрин 50 теңгеге түшүрүүгө макул болгон. 4-январь күнү нааразычылык акциялары башка региондордо уланды. 5-январга караган түнү митингчилер менен күч органдарынын ортосунда кагылышуу чыкты. Демонстранттарды шаардын борборунан сүрүп чыгарышып, бирок алар көчөлөрдү аралап жүрүштү.
Эртең менен президент Касым-Жомарт Токаев өкмөттү отставкага кетирген.
Ага карабай түштөн кийин митингчилер Алматыдагы акимчиликтин имаратын басып алышкан. Мындан башка дагы мамлекеттик администрацияларды басып киришкени айтылууда. Анын арасында Алматы аэропорту дагы бар.