БИШКЕК, 5-янв. — Sputnik. Улуттук коопсуздук мамлекеттик комитетинин Чек ара кызматы Казакстандагы кырдаалга көз салып жана чектеш аймактарды көзөмөлдөп турат. Бул тууралуу аталган ведомствонун маалымат кызматынан кабарлады.
"Кырдаал курчуган учурда ИИМ, ӨКМ жана башка мамлекеттик органдар менен биргеликте тиешелүү чаралар көрүлөт", — деп айтылган маалыматта.
Билдирүүдө Чек ара кызматынын тарамдары, анын ичинде кыргыз-казак мамлекеттик чек ара аймагында жайгашкан тарамдар да Жаңы жыл майрамына байланыштуу 2021-жылдын 30-декабрынан тартып күчөтүлгөн тартипте кызмат өтөп жатканы кабарланган.
Бул учурда Казакстандын бир канча шаарларында эл митингге чыгып, бийликке бир нече талап коюуда.
Эске салсак, Казакстанда нааразылык митингдери 2-январь күнү башталган. Жаңаозен, Атырау, Курыке, Акшукуре, Актау аймактарында автотранспорт үчүн газдын баасы эки эсе кымбаттап, литри 120 тенгеге (23, 9 сом) чыгып кеткенде нааразычылык күч алган. Кээ бирлери шаардын борбордук аянтына боз үй тигип алган.
Ал эми элдин нааразылыгы күчөп, полиция кыматкерлери менен кагылышкан видеолор интернет айдыңына тараган.
Митингчилер газдын баасын 50 тенгеге (9 сом) түшүрүү, жумушсуздук маселесин чечүү, тамак-аштын наркын арзандатуу деп үч талап коюп жаткан. Бүгүн, 4-январда, Маңгыстау облусунда бийлик газга эл талап кылган бааны койгон.
Ошондой эле кадам Актөбе облусунда болгон.
5-январда Казакстан президенти Касым-Жомарт Токаев өлкөдөгү социалдык-экономикалык абал боюнча кеңешме өткөрөрү белгилүү болду.