БИШКЕК, 3-янв. — Sputnik. "Талибан"* кыймылы автобус айдоочуларына намаз убагында жумушун токтото турууну сунуштады. Ал эми аялдар хиджабы жок жүрбөш керек. Бул тууралуу РИА Новости Афганистандын өкмөтүнүн маалыматына таянып жазды.
Маалым болгондой, аял киши хиджабы жок коомдук транспортко түшө албайт. Ошондой эле алар туугандарынын коштоосу жок 78 чакырымдан алыс эч жакка бара алышпайт.
Буга чейин талибдер автоунааларда музыка коюуга тыюу салганы айтылган. Мындан сырткары, айдоочуларга аялдарды хиджабы жок ташыбоо талабын коюшкан.
Август айынын башында "Талибан"* кыймылы Афганистандын аскер күчтөрүнө чабуулун активдештирип, 15-августта Кабулду басып алган. Анын эртеси эле согуш токтогонун жар салышкан. Августтун акыркы эки жумасында америкалык аскерлердин көзөмөлүндө болгон Кабул аэропортунан Батыштын жарандары жана алар менен кызматташкан афгандар массалык түрдө эвакуацияланган. 31-августка караган түнү дээрлик 20 жылга жакын Афганистанда болгон АКШ аскерлерин Кабул аэропортунан чыгарып кеткен.
Сентябрдын башында Афганистандын убактылуу өкмөтүнүн курамы жарыяланып, аны Мохаммад Хасан Ахунд жетектеген. Ал талибдердин биринчи жолу бийликтеги учурунда тышкы иштер министри болуп иштеп, 2001-жылдан бери Бириккен Улуттар Уюмунун санкцияларында болчу.
* — Кыймылга террордук ишмердүүлүгү үчүн БУУ тарабынан санкция салынган.