БИШКЕК, 24-дек. — Sputnik. Салык кызматынын төрагасынын орун басары Бекболот Аалиев контролдук-кассалык машина (ККМ) колдонгон ишкерлерге кандай салыктык жеңилдиктер берилерин айтты.
Анын айтымында, соода жүгүртүүсүнүн бир жылдык көлөмү 8 миллионго чейинки чакан ишкерлик менен алектенгендер салыктын бардык түрүнөн бошотулат. Бир гана ККМ колдонуу милдети бар.
"Биз мындай салыктык каникул берүүнү 2022-жылга деп киргизип жатканбыз. Бирок президент Садыр Жапаров 6-декабрда жарлык чыгарып, 8 миллион сомго чейин соода жүгүрткөндөрдү мөөнөтсүз негизде салыктан бошотуу жарлыгын чыгарды. Демек, мындан ары ага мөөнөт коюлбайт. Дагы бир жакшы жери — квартал сайын гана салыктык отчёт берет. Бирок мекемеде маяна алып иштеген кызматкерлер киреше салыгын, социалдык камсыздандырууга мурдагыдай эле төлөй турганын белгилей кетүү керек", — деди Аалиев.
Ал эми соода жүгүртүүсү 8 миллиондон 30 миллион сомго чейинки ишкерлер бирдиктүү салык режимин колдонсо болот. Анда салыктын көлөмү ишкердиктин түрүнө жараша 0,25тен 10 пайызга чейин. Мунун жеңилдиги салыктын ар бир түрүн өзүнчө эмес, жалпылап бир гана салык төгөт.
Эгер жүгүртүүсү 30 миллион сомдон аша турган болсо, Салык кодексинин негизинде ар бир түрүн өзүнчө төлөй баштайт.
Аалиев өлкөдө көмүскө экономика расмий түрдө 23-24 пайыз, эл аралык жана көз карандысыз уюмдардын анализи боюнча 40 пайызды түзөрүн кошумчалады. Ал билдиргендей, 300 миллиард сом ички дүң продукция катары эсептелбей жатат дегенди түшүндүрөт.