Ишкерлер бизнести социалдык долбоордон баштаган. 2019-жылы пластиктерди ыргытуу үчүн корзинанын формасындагы чоң бөтөлкөлөрдү шаардын аймагына орнотушкан. Пластикти топтоп иштеткен жактарга өткөрүп келишкен. Эки жылдан кийин пластикти иштеткен завод ачууну чечишкен.
"Бул ишке 65 миң доллар сарптадык, мындан ары дагы жумшамакчыбыз. Экологиянын булганышы курч маселе бойдон турат. Муну чечүүнүн жолун табыш керек. Биз бир күндө бир нече тонна пластикти иштете алабыз. Заводго келген пластик тазалоонун бир нече стадиясынан өтөт, бул өтө маанилүү", — деди ишкер.
Бишкекке жалпы жонунан 530 экоурна коюлган. Бул жол менен жума сайын бир нече тонна пластик топтолуп калат.
"Тилекке каршы, урнага пластикти гана эмес, памперске чейин ыргытып салгандар болот. Жакынкы аралыкта кыргызстандыктар биздин идеяны түшүнүп, пластик деген урналарга пластикти гана салып калышат деген ишеничтемин. Чет өлкөдө таштандыны ыргытар алдында көпчүлүк жарандар бөтөлкөнү жуушат экен. Себеби бул таштанды менен дагы бир канча адам иштей турганын түшүнүшөт. Кайсы бир күнү бизде дагы ушундай маданият калыптанат деген үмүт бар", — деди Замирбеков.
Иштетилген пластик Россияга сатылат. Ал жактан жип, сумка, пакет сыяктуу көптөгөн нерселер жасалат.