Бишкектеги ири өрт менен саат 07:46дан тарта беш бригада күрөшүп, саат 9:01де чектөөгө алды. Тез жардам кызматынын маалыматы боюнча, окуя болгон жерде жабыркагандар жок.
Анткен менен бул жолкусу аталган кампадан чыккан алгачкы өрт эмес экени маалым болду. ӨКМдин өрттү алдын алуу жана өчүрүү бөлүмүнүн начальниги Урмат Сариев билдиргендей, кампа 2020-жылдын 12-февралында да өрттөнүп, жерине ӨКМдин өрт өчүрүүчү 10 бөлүмү тартылган. Жалынды толугу менен 13-февраль күнү түшкө маал гана өчүрүшкөн.
Мэриянын маалымат кызматы тилсиз жоо катталган жерге мэр Айбек Жунушалиевдин барганын билдирип, ал шаардык кызматтарды чукул жыйынга чакырганын маалымдады.
Өрт саат 10:51де толугу менен өчүрүлүп, учурда жалпы аянты, материалдык көлөмдүн зыяны жана келип чыгуу себеби такталып жатат.