БИШКЕК, 18-дек. — Sputnik. Президент Садыр Жапаров Жалал-Абад облусуна болгон жумушчу сапарынын алкагында "Кыргызнефтегаз" ААКтын алдындагы "Кыргыз Петролеум Компани" компаниясына барды. Бул тууралуу мамлекет башчынын маалымат кызматы билдирди.
Анда Жапаровго ишкананын тарыхындагы рекорддук көрсөткүчтөрү тууралуу маалымат берилген. Алсак, завод 2020-жылы 47 миллион сомго артка кеткен болсо, быйыл таза кирешеси 160 миллион сомду түзгөн.
Ал эми "Кыргызнефтегаздын" жылдык таза кирешеси былтыркыга салыштырмалуу 558 миллион сомдон 2,5 миллиард сомго (өсүү 4,5 эсеге), мунай өндүрүү 147 миң тоннадан 173 миң тоннага (1,2 эсеге өсүү) көбөйгөнү айтылган.
"Мен буга чейин бул жакка келип кеткем. Ишкананы жакшы сактап калыпсыздар. Өндүрүлгөн продукция өлкөнүн керектөөсүнүн 6-7 пайызын гана камсыздайт, бул жетишсиз. Завод жылына 500 миң тонна мунай иштетүүгө жөндөмдүү, ушул көрсөткүчкө жеткирүү зарыл", — деди Жапаров.
Мамлекет башчысы өлкөнүн бакубатчылыгы үчүн иштеп, мамлекеттик ишканалар ушундай жол менен жанданып жатканын баса белгиледи. Аны менен катар "Манас" эл аралык аэропорту 3 миллиард сом таза киреше тапса, мурда кирешеси жок "Кыргыз темир жолу" мамлекеттик ишканасы азыр 1 миллиард 600 миллион сом пайда көргөнүн мисал келтирген.