БИШКЕК, 18-дек. — Sputnik. Бишкек мэриясы түндө автоунаа койдуруп кетип каза болгон "Тазалык" муниципалдык ишкана кызматкеринин үй-бүлөсүнө 50 миң сом өлчөмүндө материалдык жардам көрсөтөт. Бул тууралуу шаар жетекчилиги кабарлады.
Эске салсак, жол кырсыгы 18-декабрга караган түнү саат 1.20лар чамасында болгон. "Ала-Тоо" ресторанынын бет маңдайынан кызматкерди Honda CR-V үлгүсүндөгү автоунаа кагып кеткен.
"Мэрия жетекчилиги маркумдун үй-бүлөсүнө көңүл айтып, муниципалитеттин фондунан 50 миң сом өлчөмүндө материалдык колдоо көрсөтөт. Ошондой эле "Тазалык" ишканасы кызматкер жумуш учурунда каза болгонуна байланыштуу Эмгек кодексине ылайык компенсация төлөп берет", — деп айтылат билдирүүдө.
Мындан тышкары, мэрия айдоочуларга кайрылып, "Тазалык" кызматкерлери таң эрте чыгып иштегендиктен, жолдо этият болууга чакырды.
Тилекке каршы, бул үстүбүздөгү айдагы биринчи окуя эмес. 12-декабрь күнү "Тазалыктын" башка кызматкери жол кырсыгынан каза болгон.
Шаар жетекчиси Айбек Жунушалиев эки окуя боюнча тең тыкыр кызматтык иликтөө жүргүзүү тапшырмасын берди.