"Мурда Авиация институту башында самолетторду оңдоочу техникалык бир гана багыттагы адистерди даярдаса, учурда тогуз кесиптик багыт боюнча студенттерди окутат. 2015-жылы Эл аралык жарандык авиация уюму (ИКАО) кыргыз учкучтарынын даярдыгын канааттандырарлык эмес деп тапкан. Биз мындан ары кандай максаттарды коюп, кандай шартта студенттерге билим берүү зарылдыгын талдап, деңгээлди көтөрүү керектигин түшүндүк. Ошентип 2017-жылы кыргыз өкмөтүнүн токтому менен авиация колледжи жогорку окуу жай, институт болуп кайрадан түзүлдү. 1973-жылдан 2015-жылдарга чейин учкучтар Як-40, Ан-2, Ан-24 жана Ми-8 техникасын өздөштүрүштү. Бирок убакыт жаңы типтеги учактарга өтүп, замандын талабына жараша адистерди даярдоо керектигин көрсөттү. Учкучтардын теориялык билим алуусуна караганда (70 миң сом) практикалык окуудан өтүүсү алда канча кымбат. Мисалы, биздин студенттер Казакстандын Караганда шаарында жайгашкан эң ири "Балапан" авиациялык окуу борборунан практикадан өтүп келишкен. Анын баасы 25-30 миң долларды чапчыйт. Азыр акыркы бир жылдан бери учкучтар Байтик, Токмок аэродромундагы Bristol, Diamond DA42 самолеттору менен машыгып жатышат. 2021-жылы ноябрь айында "Билим - Стандарт" көз карандысыз аккредитациялоо агенттиги текшерүүдөн өткөрүп, 5 жылга лицензия алдык", — деди Иматов.