БИШКЕК, 14-дек. — Sputnik. Министрлер кабинетинин төрагасы Акылбек Жапаров Бириккен Араб Эмирлигине жумушчу сапарынын жүрүшүндө расмий бийлик өкүлдөрү менен жолукту. Бул туурасында өкмөттүн маалымат кызматы билдирди.
Ал БАЭнин вице-премьери, Дубай башкаруучусунун орун басары, финансы министри, шейх Мактум бин Мохаммед бин Рашид Аль Мактум менен инвестициялык, туризм, айыл чарба тармактарындагы кызматташтык маселелерди талкуулаган.
"Биз эмираттык ишкерлерди жана инвесторлорду инвестициялык долбоорлорду жүзөгө ашырууда кызматташууга чакырабыз жана алардын ишмердүүлүгү үчүн бардык шарттарды түзүүгө даярбыз", — деди Жапаров.
Ошондой эле эки өлкөнүн ортосунда институционалдык өнүктүрүү жана потенциалды жогорулатуу жаатындагы өз ара түшүнүшүү боюнча меморандумга кол коюлган.
Андан соң Жапаров БАЭнин министрлер кабинетинин иши жана келечеги боюнча министр Мохаммад бин Абдулла Аль Гергави менен жолугушкан.
Өкмөт башчы туризм тармагындагы өз ара аракеттенүү мүмкүнчүлүктөрү тууралуу кеп салып, акыркы 9 айда 4 миңге жакын БАЭ жараны Кыргызстанга келип кеткенин айткан. Мындан тышкары, бир катар социалдык-экономикалык долбоорлорду ишке ашыруу уланып жатканын белгилеген.
"Экономика жана инвестиция тармагында эки тараптуу мамилелерди өнүктүрүү максатында өкмөттөр аралык жумушчу топ түзүлгөн. Министрлер кабинети анын алкагында келип чыккан маселелерди чечүүгө ар тараптуу көмөк көрсөтөт. Жумушчу топтун аракеттери кыргыз-эмират кызматташтыгын илгерилетүүгө салым кошот деп ишенем. Ошондой эле биз мамлекеттик кызматтардын сапатын жогорулатууга мүмкүндүк берүүчү өкмөттүк акселератордук программалар маселесинде БАЭ тажрыйбасын пайдаланууга кызыкдарбыз", — деди Жапаров.
Өз кезегинде аравиялык кесиптеши түзүлгөн жумушчу топ соода-экономикалык жана инвестициялык тармактарда эки тараптуу кызматташтыкты чыңдоого мүмкүндүк берерин айткан.