"Манас — рух гүлазыгы" деп аталган көркөм сүрөт автордук көргөзмөмдө 30дан ашуун жаңы эмгек коюлат. Жайы менен коллекцияны иштеп чыктым. Ошондой эле сүрөттөрдүн негизинде режиссёр Айбек Байымбетов менен Жаныш Ботой "Манас — кыргыз касиети" анимациялык ролигин даярдашты. Анда сүрөттөр текст, музыка, үн менен коштолот. Бул тууралуу Майрамкул Асаналиев Sputnik Кыргызстан радиосунун эфиринде маек куруп жатып билдирди.
Анын айтымында, кыргызга тиешелүү эн тамга, тотемдерге маани бере турган учур келди.
"Эми бул "Манас" эпосу бүтпөгөн тема. Муну манасчылар да айтып бүтпөй келет. Мен буга адамдын акылы да чак келбейт деп ойлойм. Сүрөтчү катары мен өзүмө керектүү маалыматтарды чогулттум, бирок ал да аздык кылат экен. "Манас" эпосу өтө чоң, чеги жок аалам деп айтат элем. Режиссёр Болот Шамшиев да эпосту өтө терең изилдеп, "бүтүндөй бир планета" деп атаган эле. Бул кишиден да көп маалыматтарды алып калдым. Менин максатым көргөзмө аркылуу Манастагы "кайып" түшүнүгүн элге жеткирүү. Бул жерде өтө чоң сыр жатат. Аксакалдар да ушул нерсени элге алып чык дешүүдө. "Акылың бар, эсиң жок" деп айтылгандай, биз эсибизге келип, өзүбүздү таанышыбыз керек", — деди Асаналиев.
Сүрөтчү иш-чара Кыргызпатенттин Инновациялык борборунда 16-17-декабрда жабык эшик артында өтөрүн, ал эми жалпы элге 20-23-декабрь күндөрү сунушталарын кошумчалады.